- 70 -

1298, März 26. Troppau.

König Wenzel von Böhmen giebt dem Kloster das Dorf Stalsdorf bei Freudenthal als Ersatz für Trebenovicz.

Nos Wencezlaus, dei gracia rex Boemie dux Cracovie et Sandomerie marchioque Moravie, harum serie notum facimus universis tam presentibus quam futuris, quod, cum olim in annis pupillaribus seu infra annos puberes constituti villam nostram dictam Trebenovicz sitam in terra nostra Opavie, que quidem terra per alios occupata tunc temporis tenebatur, religiosis viris . . abbati et conventui monasterii de Camenicz ordinis Cisterciensis Wratizlaviensis diocesis absque deliberatione debita donassemus, nuper post revocationem dicte terre ad manus nostras dicti monasterii abbas cum aliquibus fratribus nomine conventus dicti monasterii ad nostram presenciam venientes instancius petiverunt a nobis, predictam donacionem ville prefate sibi ratificari et per nostras speciales litteras confirmari. Nos autem predictam donacionem licet ex premissis causis diligenciori discussione ac examinacione prehabitis inefficacem et inutilem penitus videremus et preterea villam ipsam absolute et sine restauro aliquo resumere et recuperare possemus, ne tamen predictos abbatem et conventum relinqueremus gracia nostra vacuos et expertes, de ipsorum beneplacito atque nostro et ad petitionem eorum, dimissa nobis et restituta per eos ipsa villa, aliam villam nostram Stalsdorf circa Wreudental sitam cum hominibus, domibus, areis, agris, pascuis, pratis, silvis, aquis, molendinis, piscationibus, proventibus, iudicio et iuribus ac pertinenciis suis omnibus abbati et conventui supradictis et successoribus eorum universis ob specialis devocionis affectum, quem ad monasterium ipsum habuimus et habemus, nec non pro nostre ac progenitorum nostrorum animarum remedio, damus et conferimus liberaliter de gracia speciali per eos iure proprietatis inperpetuum possidendam. In cuius rei testimonium presentes litteras exinde fieri et sigillis maiestatis nostre iussimus communiri. Datum in Opavia per manus venerabilis Petri Basiliensis episcopi Wissegradensis prepositi et regni nostri Boemie cancellarii principis nostri dilecti, anno domini millesimo ducentesimo nonagesimo octavo VII°. Kalendas Aprilis indictionis undecime regni nostri anno primo.

Or. Perg. Das am Rande beschädigte grosse Doppelsiegel (Thron- und Reitersiegel) an grünseidenen Fäden, wie bei No. LV. Gedr. bei Boczek, Codex dipl, et epist. Moraviae. Tom. V, p. 84; in deutscher Uebersetzung bei Frömrich S. 51.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.